Դիանա Գրիգորյանի վերջին խոսակցությունը Արա Դեղտրիկյանի հետ․ ինչ խոստում էր տվել դերասանը
Երեկ հայտնի դարձավ տաղանդավոր դերասան Արա Դեղտրիկյանի մահվան լուրը, որը խոր վիշտ պատճառեց նրա ընկերներին, գործընկերներին ու երկրպագուներին։ Շատերը ցավակցական գրառումներ արեցին՝ հիշելով նրա հետ անցկացրած ջերմ պահերը։
Դերասանուհի և սցենարիստ Դիանա Գրիգորյանը նույնպես կիսվեց իր ապրումներով՝ պատմելով վերջին անգամ Արա Դեղտրիկյանի հետ ունեցած զրույցի մասին։
«Շատ դժվար է բառերով փոխանցել այս ցավը։ Նա ոչ միայն մեծ արտիստ էր, այլև անկրկնելի մարդ՝ անկեղծ, բարի ու անսահման հոգատար։ Նրա ներկայությունը նկարահանման հրապարակում միշտ տոն էր, քանի որ նա իր հետ բերում էր ուրախություն, հումոր և ջերմություն»,- գրել է Դիանա Գրիգորյանը։
Նա նաև հիշեց, թե որքան հոգատար էր Դեղտրիկյանը․ «Երբ նկարահանումներին մասնակցում էի վնասվածքով, նա միշտ հոգ էր տանում իմ մասին, անհանգստանում, օգնում ամեն կերպ։ Նրա պոզիտիվ էներգիան միշտ սփոփում էր բոլորին»։
Գրիգորյանը պատմեց, որ վերջին անգամ Արա Դեղտրիկյանի ձայնը լսել է փետրվարի 14-ին՝ դերասանի ծննդյան օրը։ «Խոստացավ, որ, երբ մի փոքր լավ զգա, անպայման կհանդիպենք… բայց այդ հանդիպումը այդպես էլ չկայացավ»,- գրել է նա՝ անկեղծ ցավով։
Արա Դեղտրիկյանը մեծ արվեստագետ էր, ով իր դերասանական տաղանդով ու հումորով կարողանում էր մխիթարել ու ուրախացնել մարդկանց։ Նրա թողած ժառանգությունը դեռ երկար կմնա հայ հանդիսատեսի սրտերում։
