Արաբական Միացյալ Էմիրությունների փոխնախագահ, վարչապետ, Դուբայի էմիր, շեյխ Մոհամեդ իբն Ռաշիդ Ալ Մակթումի եւ նրա որդու՝ Դուբայի թագաժառանգ արքայազն, շեյխ Համդանի հետ հանդիպման ժամանակ անգլիական «Մանչեսթեր Յունայթեդի» 36-ամյա պորտուգալացի ֆուտբոլիստ Կրիշտիանու Ռոնալդուն կրել է «AZAT MARD» բրենդի հուդի։
Մանչեսթերում և Լոնդոնում խանութներ ունեցող ընկերության համահիմնադիրներից է նախկին ֆուտբոլիստ Կարեն Չոբանյանը։
Ռոնալդուն Դուբայում է անցկացնում իր կարճատև հանգիստը։
Հիշեցնենք, որ ֆուտբոլիստը վերականգնում է առողջությունը վնասվածքից հետո, պատրաստվում է երկու երեխաների ծնվելուն եւ, որպեսզի մի փոքր շեղվի խնդիրներից, իր բոլոր քմահաճույքներն է իրագործում:
Հավանաբար, գոնե մեկ անգամ ամեն մարդ մտածում է, թե ինչ տեսք կունենար իր կյանքը, եթե նա ունենար առասպելական գումար: Դրա պատասխանը հաստատ գիտի Կրիշտիանու Ռոնալդուն։
Ու թեև մարզիկը դեռ աշխարհի ամենահարուստ մարդկանց ցուցակում չէ, նա վստահ դրան է ձգտում. գովազդային պայմանագրեր է կնքում խոշորագույն բրենդների հետ, բազմամիլիոնանոց հոնորարներ է ստանում ֆուտբոլային խաղերի համար, կառավարում է սեփական բիզնես կայսրությունը և նախանձելի տեմպերով ավելացնում կապիտալը։
Ճիշտ է, գումար վատնելը Կրիշտիանուի մոտ նույնքան լավ է ստացվում, որքան աշխատելը: Նա մեծ գումարներ է վատնում թանկարժեք մեքենաների, ժամացույցների , անշարժ գույքի, ճանապարհորդությունների ու բարեգործությունների վրա:
2021 թվականի վերջին ամերիկյան Forbes ամսագիրը հաշվարկել է, որ այժմ Ռոնալդուի բանկային հաշիվներում արդեն պահվում է ավելի քան 1 մլրդ դոլար (ճշգրիտ գումարը չի կարող նշել նույնիսկ ֆուտբոլիստը), եւ այդ թիվն աճում է ամեն րոպե:
